Udeh jalan enem bulan si Bokir pacaran ame Romlah.
Tiap malem minggu Bokir ngapelin Romlah terus ngajak jalan-jalan ke proyek senen.
Kalo goncengan motor mesra banget dah, tangannye Romlah megangin perutnye Bokir.
Malem minggu ini kayak biasanye si Bokir dandan rapi jali mo ngapelin Romlah.
Bener-bener kagak nyangka kalo, nih malem bakal jadi apelnye nyang terakhir.
"Bang Bokir, ma'apin aye Bang. Rasenye aye udeh kagak cocok lagi ame Abang, kite putus aje ye Bang" katenye si Romlah.
Biarin dirayu-rayu segala macem, Romlah tetep pengen minta putus.
Bokir lemes dah, sedih banget atinye, terus pamit pulang.
Pas mo pulang, si Bokir ngeliat ade kaos ditaroh dikursi.
"Neng, kaosnye buat abang aje ye, bakal kenang-kenangan." kate si Bokir.
"Eeehhh !!! Jangannn Baaangg. Itu tuh kaos kotor mau aye cuci . ." katenye si Romlah.
Si Bokir udeh kagak ngedengerin omongannye Romlah, begitu nyamber kaos langsung ngacir pulang.
Abis putus, dari pagi sampe sore Bokir manyun mulu didalem kamar. Makan kagak enak, tidur juga kagak bisa, nyang kebayang cuman Romlah terus.
Biarin baunye asem ame apek, ame si Bokir kaosnye disimpen dibawah bantal.
Siang malem si Bokir nangis sambil nyiumin kaos kenang-kenangan ame ngebayangin mase-mase indah waktu pacaran ame Romlah.
Udeh seminggu si Bokir nangis mulu didalem kamar, enyaknye sampe kuatir.
Pas udeh liwat seminggu, tau-tau enyaknye nggedor pintu kamarnye Bokir, katenye ade telpon dari Romlah nyariin Bokir.
Busyet dah !!. Si Bokir langsung jingkrak-jingkrak ngibrit nyamber telponnye, atinye deg-degan seneng banget.
"Haloo sayang . . ." katenye si Bokir.
"Eh ini Bang Bokir ye ..? " katenye si Romlah.
"Iye bener Neng. Abang udeh ngire neng bakal nelpon abang, aduuh neng, abang kanget banget ame neng." kate si Bokir nyrerocos.
"Eh Bang Bokir, tiap hari babe aye nanyain Bang Bokir mulu.." katenye Romlah.
"Aduuh neng, abang kagak nyangka kalo babelu perhatian banget ame abang. Ape kate babelu ..??" si Bokri nanya.
"Babe marah-marah nyuruh abang ngembaliin kaos babe" kate si Romlah.
